Шерхан Мұртаза нақыл сөздері

XX ғасыр ғалымдары мен жазушылары · 1932–2018 · 15 сөз

Шерхан Мұртаза — қазақ жазушысы, публицист, журналист, қоғам қайраткері, Қазақстанның Халық жазушысы. «Қызыл жебе» роман-эпопеясы мен «Ай мен Айша» романының авторы. Ана тілі мен ұлттық рух мәселелерін үнемі көтеріп отырды.

1. Рухы мен намысы сөнген ел — өлген ел.
2. Ана тілінсіз халық болмайды. Тілінен айырылған ұлт — тарихынан, түп-тамырынан айырылған ұлт. Тілсізді ұлт деуге болмайды. Тілінен айырылған халық — ата-бабасының, туған әкесі мен анасының атын ұмытқан халық. Ал ондайларды мәңгүрт деп атайды.
3. Ана тіліміздің мәртебесін көтеру — басқа тілдердің жолын кесіп, бағын байлау емес. «Өзің өлме — өзгені де өлтірме» деген сөз.
4. Ұлтсыздық — отансыздықтың белгісі.
5. Сақтасаң — қазаққа жау болған қазақтан сақта!
6. Рухани әлемі кең, рухы биік ел — қайсар ел. Ондай елді ешкім жеңе алмайды. Рухы сынған, рухани жүдеген елді жеңу де — жеңіл.
7. Отанды, ұлтты, әдебиетті, оның болашағын сүю үшін көп айқайдың керегі жоқ. Тынымсыз, жанашыр, табанды әрекет керек.
8. Рухани азып-тозу — өліммен тең.
9. Рухтың анасы — ана тіліндегі кітап...
10. Тәуелсіздік — адам құнымен өлшенеді.
11. Мемлекетімізге, зарығып жеткен тәуелсіздігімізге төніп тұрған орасан қауіп — жемқорлық, парақорлық, ұрлық-қарлық!
12. Демократия — жүгенсіздік емес,
    Бостандық — жүйесіздік емес.
13. Тәуелсіздіктің жолы — қатты, дәмі — тәтті.
14. Астана — қазақтың бөлінбес бірлігінің, мәңгілік тұтастығының символы болуы шарт.
15. Қазақ елі — жаралы теңбіл барыс сияқты. Ылдидан қарғып шыққан жолы қан сорғалаған ізге толы. 1916 жылғы ұлт-азаттық қозғалыс — 1986 жылғы ұлт-азаттық көтеріліске жалғасты.