Үйдің керек-жарақтары және жиһаздар туралы жұмбақтар

Үйдің керек-жарақтары және жиһаздар туралы жұмбақтар — 57 жұмбақ. Әрқайсысының жеке беті бар.

1. Қараңғы үйде белін буған бек жатыр.
2. Жалпақ бетті батыр, / Белін буып жатыр.
3. Жақсы жерде жүреді, / Жаман жерде жатады.
4. Белін берік байлаған, / Босағадан жай алған. / Лас, қоқыр, шаң-тозаң, / Қосақтап бәрін айдаған.
5. Базардан белбайлау қыз әкелдім.
6. Екі егіз қарсы келді, / Арасына көк мұз түсе берді, / Біреуі жанды, біреуі жансыз.
7. Қысы-жазы үйде тұрады, / Өзі мұзға ұқсайды. / Бетінде сәулесі бар, / Бұл жұмбағым кімге ұнайды.
8. Болғанда бір ауызға екі қақпақ, / Еркінде адамзаттың ашып-жаппақ. / Қаншалық білім-өнер, азық-ауқат, / Ішінде сол нәрсенің қойған сақтап.
9. Басы жоқ төрт аяқты жансыз бір зат, / Құлағы жоқ, көзі жоқ, бейне бір ат. / Жүк артсаң әсте белі майыспайды, / Құйрық-жалсыз, бұл не қылған зат.
10. Төрт аяқты болса да жүре алмайды, / Өздігінен бір нәрсе біле алмайды. / Жайылған дүниеге бір ғажайып, / Тік көтеріп отырар адамдарды.
11. Өзі кірден арылмас, / Ізінен кір табылмас.
12. Бір қыз қарап тұр, / Шашын тарап тұр. / Белін буып тұр, / Бетін жуып тұр.
13. Белі бір, белбеуі он бір, / Кетпейді өмір бойы бетінен кір.
14. Бір үйден бала көрдім басы жалпақ, / Белінде белбеуі бар бунақ-бунақ. / Тымтынып үй ішінде жүгіреді, / Ерте-кеш, анда-санда, уақ-уақ.
15. Сақалы жоқ, шашы бар, / Бет-аузы жоқ, басы бар. / Белін бекем байлаған, / Қоқсықты қоймай айдаған.
16. Бес жерінен буынған, / Еңбек десе жұмылған.
17. Үйде жездем жатыр, / Жез белбеуін орап жатыр.
18. Кіруге адам батпайды, / Затыңды аман сақтайды.
19. Бір нәрсе төртпақтасып ұйықтап жатыр, / Қарнына көрінгеннің бәрін жұтар. / Адамзат қажеттісін іздегенде, / Қаңқ етіп ала ғой деп аузын ашар.
20. Төрт бұрышты, / Бір ауызды.
21. Бір итім қабаған, / Аузына темір жамаған.
22. Бір нәрсе төрт аяқты, екі басты, / Көтеріп адамзатты көңіл ашты, / Бір адым жерге өзі бара алмайды, / Аяғы болса дағы қозғалмас-ты.
23. Көп жерде кездеспейді осы шұбар, / Шұбарға мінген жанның бәрі құмар. / Жүк артып мінсе дағы қанша оны, / Сонда да арықтамас ол жануар.
24. Болғанда беті гүлді, асты сырлы, / Жинаған арасына жүн-жүбірді. / Төрт бұрыш, тоқсан жолды торқасымақ, / Халінше адамзатқа пайда қылды.
25. Бір нәрсе өзі жансыз керіледі, / Қампиып қарны торсық көрінеді. / Ісі бар және о дағы таңғажайып, / Сабаса екі жақтап семіреді.
26. Дүниеде бір қақпас бар құйған қыштай, / Ішінде түрлі аң жатыр іші пыспай. / Қапастан сол аңдарды шығарған соң, / Отырар құрмет етіп ұстай-ұстай.
27. Жайсам, жамшыдай, / Жисам, қамшыдай.
28. Түнде түйедей, / Күндіз түймедей.
29. Жайса, көлдей, / Жиса, жеңдей.
30. Жатса, қояндай, / Тұрса, түйедей.
31. Аяғы жоқ, қолы жоқ, / Көйлегі көк, қарны тоқ.
32. Керегенің басында / Мақпал қоржын.
33. Кішкентай ғана мінтас, / Алып ұрсам сынбас.
34. Табан-табан, табан-ай, / Табаны жалпақ қоян-ай. / Көлеңкесі күмістен, / Күліп тұрған қоян-ай.
35. Қарап тұрсаң өзіне, / Сурет түсер көзіңе. / Ол суретің ұқсайды / Дәл қазіргі кезіңе.
36. Бір көл бар, мөлдір емес, лас емес, / Ішіне ит түссе де, арам емес.
37. Адамды тартып алар көрсе өзі, / Мелшиіп қарап тұрар болмай сөзі. / Жанына барған кісі екеу болар, / Бетіне түртіп қалсаң, шығар көзі.
38. Алдыма келіп бір сағым, / Көрінді менің көзіме. / Бұл қалай деп сенбеп ем, / Дәл келтірді өзіме. / Байқап тұрсаң, бір ғажап, / Аждаһадай тұлғасын / Сиғыздыра әкелген / Алақандай көзіне.
39. Әрі отыр ләйлім құс, / Бері отыр ләйлім құс. / Көлеңкесі күмістен, / Күліп тұрған ләйлім құс.
40. Бір дария жерде емес, көкте де емес, / Дарияның аузы көмеш, түбі төгеш. / Суының мөлдірлігі таңқалғандай, / Ішіне ит түссе де, арам емес.
41. Күнде оған қараймын, / Қара шашым тараймын.
42. Сүңгідім суға қарап етпетімнен, / Артыма бір қарадым кеткенімнен. / Әлгі су сүңгіп кеткен мұз боп қатты, / Тағы да шығар-шықпас еркі өзімнен.
43. Көлеңкесін көріспек, / Көріп тұрсаң, күліспек.
44. Үстінен ажырамас ағаш енді, / Қарасаң күлкісіне, тамаша енді. / Сұлулық, көркемдікке әуес болған, / Адам менен өзі жүрер таласа енді.
45. Бір нәрсе су ішінде болды пайда, / Дарияға оны алатын дәурен қайда.
46. Дөңгелек айналасы, үсті тегіс, / Табылар тарапынан түрлі жеміс. / Төртеуі ағайынды тату екен, / Олардан аулақ жүрер ұрыс-керіс.
47. Төрт келінге бір орамал.
48. Арқасында азығы, / Бауырында қазығы, / Күнде шүлен тарқатар, / Оның неден жазығы?
49. Бір нәрсе дөңгеленген төрт аяқты, / Көтерген үш уақыт барлық затты. / Жем беріп, сол уақытта келгендерге, / Етеді көңілін шат, әрі ауқатты.
50. Бір дария жерде де емес, көкте де емес, / Төрт тіреу төрт жағынан тұрады егес. / Үстіне алуан түрлі жеміс шашып, / Бірнеше үйрек келіп қонады еміс.
51. Бір нәрсе ет жемейді, су ішпейді, / Үстінен оның, сірә, жан түспейді. / Шаршамас, белі талмас, сондай мықты, / Тұруға жалықпайды, беріспейді. / Міні жоқ, бойы сұлу болғанменен, / Таңырқап оны адам көріспейді. / Мінезі сол нәрсенің сондай жуас, / Бір-бірін бөтен малдай тебіспейді. / Жұмысын салтаң мініп бітірмесе, / Жегуге арба шана көніспейді.
52. Адам жоқ, салмақ салмаған, / Орны жоқ, кезіп бармаған. / Тізе бүкпей әлі тұр, / Сонда да таяғы талмаған.
53. Бар екен бір асыл зат белін буған, / Қаншама жиренбейді лас судан. / Жаны жоқ кеудесінде болса дағы, / Қалмайды көп жиылған ұлы дудан.
54. Өзі кірді ашады, / Суға салсам, қашады.
55. Бұдан кір қорқады, / Судан бұл қорқады.
56. Бір нәрсе екі түрлі заттан болған, / Адамзат шығарады істеп қолдан. / Жұмсаймыз уақытымен тазалыққа / Өмірі ақырында бітер содан.
57. Бір жігіт үш белбеу байланады.