Қол ісі туралы жұмбақтар

Қол ісі туралы жұмбақтар — 67 жұмбақ. Әрқайсысының жеке беті бар.

1. Шаршамас кемпір көрдім жалғыз аяқ, / Аузына тістеп алған шиден таяқ. / Жүрген сайын белбеуін қабаттайды, / Беріпті әсемдікті аямай-ақ.
2. Ақ күшігім жүгіре-жүгіре буаз болды.
3. Жалғыз ғана көзі бар, / Алтыннан белбеуі бар, / Жыңғылдан таяғы бар.
4. Мұрның-мұрның, мұрынды, / Мұрның неден жырылды? / Аузы-басын түк басып, / Сені неден жын ұрды?
5. Көк лағым көген сүйреді.
6. Көрінген жол үстінде доғалай бас, / Қолы жоқ, аяғы жоқ бұл қалай бас? / Жағынан шапалақпен сипап ұрсаң, / Атындай жолаушының жорғалай бас.
7. Зырлайды күшік әжемнің, / Қолынан сүйек кеміріп. / Күн асқан сайын ақ күшік / Барады мүлде семіріп.
8. Жиһанда бір құс көрдім жалғыз аяқ, / Аузына тістегені қылдан таяқ. / Бір ұрсаң шапалақпен, семіреді, / Белбеуі бар белінде сансыз қабат.
9. Бар екен бір мақұлық жалғыз аяқ, / Аузына тістегені шетен таяқ. / Құдайдың құдіретіне таңғажайып, / Белбеуі беліндегі тоқсан қабат.
10. Әрмен жүгір қараша ат, / Бермен жүгір қараша ат. / Ор түбіне келгенде / Тайып жығыл қараша ат.
11. Ақ лағым арық еді, / Құйымшағы сымпиған. / Әжем бір күн бағып еді, / Семіз болды бұлтиған.
12. Шыр көбелек айналар, / Беліне жіп байланар.
13. Бөркі бар жақсы басында, / Он кісі бар қасында. / Бұйда тағып жетектеп, / Үйреттім өзім жасында.
14. Іші қуыс, / Тысы тас.
15. Бар екен дүниеде жалғыз көзді, / Сол көзбен дүниенің бәрін кезді. / Әлемді он сегіз мың киіндіріп, / Дүниеден жап-жалаңаш өзі безді.
16. Сүйегі бар, еті жоқ, / Көзі бар, беті жоқ.
17. Тап-тап, тап жорға, / Табаны үшкір көк жорға, / Желіп кетсе жеткізбес, / Жерге түссе табылмас.
18. Жылт-жылт еткен, / Жылғадан өткен. / Балдырған безген, / Кентті кезген.
19. Бір кішкене балауыз, / Ол балауыз шығып болса, / Жұрттың бәрі жалауыз.
20. Кішкене темір, / Шидеректің о жағынан, / Бұ жағынан өтеді.
21. Байлап едік тайлақты, / Мұрнынан арқан өткізіп. / Байласам да тұрмайды, / Шыр айналып жүгіріп.
22. Жылт-жылт етеді, / Жүгіріп өтеді.
23. Кірш-кірш етеді, / Ішіне кіріп кетеді.
24. Жылмаң-жылмаң етеді, / Жылмаңдатып сайдан өтеді, / Із-міз тастап өтеді.
25. Мұрнында байлауы бар, / Адамның айдауы бар.
26. Дүниеде бір жебір құрт бар, / Артында бір жібі бар.
27. Дүниеде бар екен жалғыз көзді, / Киімін үйіп тастап, күдер үзді.
28. Жүгіріп кетсе, жүйрік бір, / Лып-лып етіп ойнаған. / Кереметі құйрық бір, / Құтаймай-ақ қойды оған.
29. Әйдей-әйдей бесеуі / Темірден екен көсеуі.
30. Қылдырықтай бір нәрсе иретілген, / Мойнында ұзын арқан сүйретілген.
31. Бір тышқанда екі құйрық.
32. Сығайған – сенікі, / Сулап салған – менікі.
33. Үйрегім ұзақ сүңгіді, / Құйрықсыз қалды бір күні.
34. Уқалап-уқалап тұрғыздым, / Сулап-сулап кіргіздім.
35. Аузы менен көзі бар, / Сүйретіп досын ертіп жүр.
36. Сулап-сулап тұрғыздым, / Итеріп-итеріп кіргіздім.
37. Бастайды көп жыланды бір көк жылан, / Бір нәрсе жыландармен соғыс қылған. / Көк жылан бір нәрсеге көнек болып, / Тауысып барлығын да тыныш қылған.
38. Сүйрей, сүйрей сүйреткімді жоғалттым.
39. Пісіп алса, ілінбейді, / Қайта тартса, ешнәрсе ілінбейді.
40. Ін қазып тұмсығымен жып-жып еткен, / Арқаны жүреді артта қалмай ерткен. / Жыбырлап істегені тез өнеді, / Іс қылып алғыс алар талай көптен.
41. Екі басты жалмауыз, / Кейіп аузын ашады. / Алдына түскен нәрселер / Өзінен-өзі қашады.
42. Бір әйеки құс екі қанатының / Ұшында екі көзі бар, / Анжал-манжалды өзі алып жей алмайды.
43. Тіс деген жоқ, ерні өткір, / Қазықтаулы көмейі. / Қан шығармай өмірде бір, / Өлтіреді, жемейді.
44. Бар екен бір жансыз зат сиыр тұмсық, / Матаның күнде жейді басын қыршып. / Матаның жеген сайын басын қыршып, / Артынан түбіт тұрар қыл-қыбыршық.
45. Бір нәрсе өзі жансыз жоқ қой жаны, / Бір тарау ортасында байлағаны. / Өзі жансыз жандының себебімен, / Қалады жерге түсіп шайнағаны.
46. Бір нәрсе үш аяқты сүйір тұмсық, / Жейді екен бір жайынның басын қыршып. / Жесе де ол жайынның тояры жоқ, / Қарасаң ішін ашып, шөп пен қылшық.
47. Қолымда бір құсым бар екі басты, / Аяғын басқан кезде нәрсе қашты. / Аузын аждаһадай ашқан кезде, / Өлектеп атып тастар ішкен асты.
48. Жарқылдаған қос қылыш, / Қолға тисе, жоқ тыныш.
49. Сызылған жолға түседі, / Бойына шақ қып пішеді.
50. Екі темір бірігіп, / Кесіп, пішіп береді. / Екеуі бірге жүрмесе, / Жоқ қой бізге керегі.
51. Бір шұқырда мың шұқыр.
52. Мылжа басты, / Мың көзді.
53. Адамға сонша пайдалы, / Басында сансыз көзі бар.
54. Бір атым бар өзі өте шабан, / Бірден артық мінбейді оны адам, / Қамшылап күні бойы тебінсем де / Япыр-ай жылжымайды төрт-бес қадам.
55. Қыл-қыбыр да жүн қыбыр, / Жұла берсе, жарасар. / Екі мұртын қайырып, / Ұра берсе, жарасар.
56. Қылмаң-қылмаң етеді, / Қаға берсең, жарасар. / Екі жағын жапырып, / Ұра берсең, жарасар.
57. Жүріп келем, жүріп келем, / Екі етекті қусырып ұрып келем.
58. Қосақтап серпе бердім, / Соңынан жорта бердім.
59. Жыңғыл тақтым жұртыңа, / Жылпылдап бұтыңа. / Әне-міне дегенше, / Өте шықтым сыртыңа.
60. Өзен бойын өрледім, / Су таба алмай шөлдедім. / Оң қолымдағы найзаны / Олай-бұлай сермедім.
61. Ұзын-ұзын жолдар бар, / Үйрек қонар көлдер бар. / Ат үстінде шоқиып, / Отыратын күндер бар.
62. Сиыр сойдым жұртыма, / Сымпылдаттым бұтыма.
63. Мамық, шуаш иісті, / Шыр айналып жіп болар. / Тоқыса, жылылығы күшті / Ағашқа құйындап оралар.
64. Шым шиедей қотыр.
65. Өрнектеп, сәндеп, / Тістерін бүгетін, / Солпысын жөндеп, / Кім көйлек тігетін?
66. Оның тіккен бұйымы, / Аяғыңда қартайды. / Шыға қалса жұлымы, / Әдемілеп баптайды.
67. Кішкене өзі, мың көзді.