Желдірме
Үкілі Ыбырай · 1860–1930 · 26 жол
Заулап қал тілім, мүдірмей,
Аққан бір судай, кідірмей.
Еркін жүйрік белгісі —
Бауырын жазбас жүгірмей.
Пенденің бітпес жұмысы
Қара да жерге көмілмей.
Жайқалды, шіркін, қызыл тіл,
Күзгі бір піскен егіндей
Сараңнан қайыр тимейді,
Жайлаған жылқы тебіндей.
Жолдас болсаң жақсымен,
Терең ойлы, ақылы кең,
Кіші пейіл, сыр шашпас,
Мінезі, білім келсе тең.
Жанған отқа бір кіріп,
Жау қолына тастамас,
Ішіңе кіріп, тор құрып,
Алдап сені қастамас.
Қайқақтамай көтерер,
Досы үшін зілдей тау тасын.
Таза жүрек, ақ пейіл
Ренжітпейді жолдасын.
Өзің жалтақ, өсекшіл
Болсаң, өмірі оңбассың.
Іші қулық, сұрқия,
Кездессең соған, сорларсың.