Ақан серіге
Үкілі Ыбырай · 1860–1930 · 20 жол
Көз қайда, айнадай боп жайнайтұғын,
Тіл қайда, бұлбұлдай боп сайрайтұғын?
Əн қайда, қанша естісең тоймайтұғын,
Ақыл қайда жер түбін болжайтұғын?
Айтысқанды аз сөзбен байлайтұғын,
Асыл қайда бұрқырап қайнайтұғын?
Өзің ақын, өзің би, Ақан аға,
Күн туды-ау, саған жоқтау арнайтұғын.
Құлады тауым алдымда,
Есімнен танып қалдым ба?
Тойымсыз туған қара жер,
Ақанды да алдың ба?!
Жайлы болсын тұрағың,
Пейіште жансын шырағың.
Шұрқырап шығып қарсы алсын,
Құлагердей пырағың.
Салтыңа мəңгі ерейін,
Жабыққан жанды жебейін.
Ақан-аға, бақыл бол,
Одан артық не дейін?