Қарақат көзді, сым саусақ (I түрі)
Үкілі Ыбырай · 1860–1930 · 30 жол
Қарақат көзді сым саусақ,
Лебізің сенің бал қаймақ.
Жолыңа сенің сарп етпей,
Неге де керек малды айдап.
Қадірін білмес ақымақтар,
Атын бір қалсын борбайлап.
Қарақат көзді ақ білек,
Айтайын бір сөз үлгілеп.
Қайғың алды денемді,
Жүректің басын тілгілеп.
Жананай сөзді қой, сəулем,
Қалмасын көңіл құр жүдеп.
Карақат көзді ернің бал,
Сен кеткен соң не дүр хал.
Жолдасың теңдес болмаса,
Керексіз қалар жиған мал.
Ұшып кетер қызыл гүл,
Жан-жағыңа көзің сал.
Шолпанның едің жұлдызы,
Мұқиттың едің құндызы.
Ардақтаған жұмақта
Өзіңнен аспас хор қызы.
Өмірімнің еркесі,
Балбырап тұрған қырмызы.
Көктемнің көркем айындай,
Қытайдың қағаз шайындай.
Еркелейсің жан сəулем,
Қысырдың арда тайындай.
Жарқ етіп шықшы алдымнан,
Еш адамнан тайынбай.