Отаршылдық қыспағы
Үкілі Ыбырай · 1860–1930 · 40 жол
Айрылып туған жерінен,
Бишара қазақ талып тұр.
Қолынан келер шама жоқ,
Ішің бір оттай жанып тұр.
Еркі болса өзіңде, ...
Құлан да кетпес қағынан,
Тағдыр жазса болмайды,
Жасқанбасқа жауынан.
Қойдай шулап жөнелді,
Атамыз қонған тауынан.
Алыстан төбең көрінген,
Көрінумен хабар берілген,
Қош-есен бол, Жалғызтау,
Бауырыңды қыстап, жаз жайлап
Атамыз қонған тау едің,
Жан-жағымда пана едің,
Ешкімнен көрмей кемдікті,
Бетіммен өскен жан едім.
Қош-есен бол, Жалғызтау,
Сыртында биік заңғар бел,
Суыңды ішіп, шөбін жеп,
Күнелткен сенен қалың ел.
Ол заман қайтып келмейді,
Соғып өткен ол бір жел.
Ел мен жер еске түскенде,
Көзімнің жасы болар сел.
Сұм дүние алдаған
Адамзатты жалмаған
Кім бұзады еркімен
Қондырған ата сарайын.
Ата қонған сарайдың
Кім кетер қиып маңайын.
Қиыны мен оңайын,
Аманат сізге, ағайын.
Қош-есен бол, рухтар,
Аққан бұлақ тұнықтар.
Жалмауыз жалған дүние
Қайсыңызға тұрақтар.
Ризық дəмің біткен соң,
Күн сайын ажал жуықтар.