Біржанның Тезекбай ақынмен қағысуы
Біржан сал Қожағұлұлы · 1834–1897 · 26 жол
Тезекбай:
Бұл өнерді кім берді, Біржан, саған,
Өнер берген кісіңді айтшы маған.
Өнер берген кісіңді айта алмасаң,
Сенің өлең айтуың тіпті арам.
Біржан:
Жаратқан бәрімізді – бір құдайым,
Абзал қылып жаратқан күн мен айын.
Өнердің бойға біткен арқасында,
Тезеке-ау, салдық құрмай не қылайын.
Тезекбай:
Рас, бәрімізді жаратқан – бір құдай-ды,
Абзал қылып жаратқан күн мен айды.
Бір құдайдың бірлігін хақ деп білсең,
Неше сипатпен танисың бір құдайды.
Біржан:
Өзің молла, оқисың жазған хатты,
Сері қайдан біледі шариғатты.
Әкем Қожағұл болғанда, өзім – салмын,
Мен сізден сұрамаймын насихатты.
Тезекбай:
Олай болса, отырғанда, ақынмен ой таба бер,
Күндіз-түні жүрсең де жол таба бер.
Орта жүздің баласы «Темір Қақпан,
Байғұлыбай»
деп әне, зарлап тұр ғой.