Аяңыздар жетімді
Міржақып Дулатұлы · 1885–1935 · 21 жол
(Ғ. Тоқай ізімен)
Жақсы сізге, балалар,
Қысқы кеште рақат!
Жылы үйде жайланып,
Отырсыздар көңіл шат.
Ызғарлы боран соқса да,
Терезеге тақта-тақ.
Балапандай ұяда
Уайым жоқ сізге нақ.
Бәріне жұрттың жасаған
Бермеген бірақ түгел бақ.
Толып жатыр жалғанда
Жетім-жесір, кем бейбақ.
Біреулердің шешесін
Ерте алған ләхат.
Кейбір балалар айырылған
Атасынан бейуақ.
Осыларды, балалар,
Кез келтірсе сізге хақ.
Бірге туған бауырыңдай
Еркелетіп бағып-қақ.