Әкелі-балалы кісілер
1 мин оқу
Бір күні Қожа мен жолдасы екеуі базарды аралап келе жатып, қызыл шеке болып, төбелесіп қалған екі адамды көреді. Жолдасы Қожаға:
—Жүр, мыналарды арашалайық,—дейді.
Қожалар жақындай бергенде, төбелес басылып қалады.
Төбелесіп жүргеннің біреуі:
—Мен бұған дейін білмей жүріппін, сен нағыз салпаң құлақ есек екенсің ғой,—депті.
—Мен есек болсам, сен қодықсың,—дейді екіншісі.
Сонда Қожа жолдасын тоқтатып:
—Жүр, аулақ кетейік, жанжалдасып жүрген әкелі-балалы кісілер екен, арашашының қажеті бола қоймас,—депті.