Ақан серінің қондырмаған үйге шығарғаны
Ақан сері Қорамсаұлы · 1843–1913 · 18 жол
Қоскөлдің көк мұзы жайларында,
Шошақай, томпақай шөп байларында.
Көтерем ірі малда толып жатыр,
Өлім бар жабағы мен тайларында.
Түріне қарап тұру қиын болар,
Кедір-бұдыр мұздары бар сайларында.
Қоскөлге амандаса келе алмайсың,
Март пенен февралдың айларында.
Қабағы ашық болмайды қыстаған ел,
Жел жағын Ботаменен тыстаған ел.
Аузыңның бес шақырым зары тиіп,
Маңайыңнан қоймайсың қыспаған ел.
Биеміз құлындап, айымыз март боп кетті,
Қазақ қонақ қондырмайтын сарт боп кетті.
Байы мен жарлысы əдет қылып,
Жұртқа «шөп жоқ» дейтұғын шарт боп кетті.
Біздің айтқан сөзіміз жара болып,
Зым-зия екі жігіт тарт боп кетті.