Тесіктау қайда?
Жиренше шешен · 1 мин оқу
Бір адам: «Осы Жиреншені әркім мақтайды, Жиренше сөзден сүрінбейді және сұраған нәрсенің бәріне табан астында жауап айтады дейді. Мен де барып сөз сұрап көрейінші» деп Жиреншеге айтыпты:
– Әу, Жиренше, сізді әркім бір мақтайды, шешен, білгіш дейді. Қане білгіш болсаң, Тесіктау қайда соны айтшы! – дейді.
– Тесіктау мына тұрған қызыл төбешіктің астында, – дейді Жиренше.
Сонда әлгі кісі «Төбешік, Төбешік» деп қайталап айтады да:
– Ол төбешігің алыс па, жақын ба? – деп сауалдайды. Сонда Жиренше шешен:
– Алыс емес, тиіп тұр, жүр, үйге кірелік! – депті.
Үйге кірген соң, Жиренше әйеліне:
– Мына кісіге сусын бер, – дейді. Әйелі сусын әкеліп, әуелі күйеуіне, содан соң қонағына ұсынады. Жиренше сусын кұйылған тостағанды ұстап отырып:
– Міне Тесіктау! Бес тұлпарға мінесіз, қызыл төбешіктің астындағы тесік таудан былай өтесіз, – деп тостағандағы айранды сіміріп салыпты. Сонда әлгі кісі:
– А, Тесіктау деген тесік тамақ екен ғой, енді ешнәрсе сұрамай-ақ қояйын.
Жиренше, қош-аман бол, – деп қайтып кетіпті.