Қырық сұрақ
1 мин оқу
Қожанасыр ауылына бірде фәлсәфаға құмар ділмәр біреу келіпті де:
—Ауылдағы ең ақылды адам кім?—депті көпшілікке.
—Қожанасыр,—депті көпшілік.
—Ендеше шақырыңдар.
Қожанасыр келеді.
—Мен саған қырық сұрақ қойсам,—деді бейтаныс желпініп.—Сен оларға екі-ақ сөзбен жауап бере аласың ба?
—Берейін.
Бейтаныс санап отырып қырық сұрақ қояды да:
—Кәне, жауабыңды екі-ақ сөзбен айтып байқашы,—деп кекесінмен күледі.
—Түсінсем, бұйырмасын,—депті Қожанасыр.