Қынжыл
Балуан Шолақ · 1864–1919 · 18 жол
Айтуға мен бір өлең көңілім ауып,
Қыз бала, алдыңда тұр үлкен қауіп.
Əкеңнің оң жағында ойна да күл,
Бір жақсы жігітпенен теңің тауып.
Əкеңнің оң жағынан кеткеннен соң,
Жүрерсің бөтен елде сиыр сауып.
Егер де, күйеуіңе жақпай қалсаң,
Басыңа кетер сонда қамшы жауып.
Жіберер əкең сені малға сатып,
Мал болса, болғаны ғой Тəңір атып.
Жігітпен көңілің сүйген ойна да күл,
Айтамын осы өлеңді таңырқатып.
Жігітке өзің сүйген бара алмасаң,
Өтерсің бір жаманмен сілең қатып.
Уəй, сəулем, ұғып алшы бұл сөзімді,
Сендерге айтқан менің нəсихатым.
Ойланып түбінде бір білерсіңдер,
Сөзімнің шындығы мен һақиқатын.