Баба Түкті Шашты Әзіз
Әпсаналар · 1 мин оқу
Баба Түкті Шашты Әзіз – өз қауымының көсемі екен. Өз заманында өте данышпан кісі болған екен деседі. Міне, оның осы қасиетін жоғары бағалаған Ысқақ баб оны өзіне уәзір етіп алған көрінеді. Шашты Әзіздің Ислам дініне кіргенін көрген халық: «Бұл діннің қандай артықшылығы бар? « - деп сұрайды. Сонда ол осы дінді қабылдағасын Алланың нұры жауғанын айтып, аса таяғын жерге шаншып қалғанда, сол жерден су шығады. Оған есі шыққан жұрт артынша Шашты Әзіздің екінші бір кереметін көреді. Ысқақ баб алпыс түйе отынды үйдіріп, үстіне Шашты Әзізді отырғызады да, от қойдырады. Мұны көрген халық біздің әулиемізді өртеп жібердің деп шулайды. Осы кезде алаулаған от басылып, өрт өшкен кезде Шашты Әзіз аман-сау оттың ортасында құран кітабын қолына ұстаған күйі отыр екен. Міне, содан бастап ел Ислам дінін мойындап, құдіретіне бар ықыласымен бас иеді.