Алайкөк
Ақан сері Қорамсаұлы · 1843–1913 · 27 жол
Дария ағып жатқан суда сын жоқ,
Жануар өлдім деген малда тіл жоқ.
Құрбылар, тіршілікте ойна да күл,
Бұл дəурен екі айналып келмегі жоқ.
Қайырмасы:
Ақ-қау, ала-лай көк,
Үкілі қоңыр үйрек,
Кеткенде ауылың шалғай,
Уа шіркін, қалдым жүдеп.
Салғанда қара өлеңге тілім майда,
Тілімнің майдасынан көрем пайда.
Əрдайым мəдет берсе тіл-жағыма,
Салайын түрлендіріп осындайда.
Қайырмасы:
Ақ-қау, ала-лай көк,
Үкілі қоңыр үйрек,
Кеткенде ауылың шалғай,
Уа шіркін, қалдым жүдеп.
Ұшып жүрген əуеде қара шыбын,
Қолдан шыққан нəрсенің бəрі шығын.
Көрмегелі көп айдың жүзі болды,
Аман-есен жүрмісің, қарашығым.
Қайырмасы.
Ақ-қау, ала-лай көк,
Үкілі қоңыр үйрек,
Кеткенде ауылың шалғай,
Уа шіркін, қалдым жүдеп.