Сырда адам нанды жатып жейді
1 мин оқу
Баяғыда бір Сыр қазағы жұмысы болып, арқа еліне барыпты. Онан жұрт:
—Сіздің елде тұрмыс, күнкөріс қалай?—деп сұрайды.
—Біздің елдің тұрмыс жайының несін айтайын: ондағылар нанды жатып жейді,—депті.
Бұған қызығып нанды еңбексіз жатып жегісі келген Арқаның бір қазағы Сырға ауады. Сырға келіп жұрт қатары диханшылық қылады: таңның атысы, күннің батысы ыстық күнге күйіп, жанталасып тынымсыз жұмыс істейді, әбден шаршап титықтайды. Алдындағы асын отырып ішуге шамасы келмей, жатып ішеді. Сонда ол:
—«Сыр адамы нанды жатып жейді дегені осы екен ғой»— депті.