ChatGPT-та киімді виртуалды киіп көру мен таңдаулы тауарларды сақтау іске қосылды

Селфиіңізді жүктеп, киімнің өзіңізге қалай жарасатынын экраннан көре аласыз. TechCrunch мәліметінше, OpenAI бейсенбіде ChatGPT-та виртуалды киіп көру мен ұнаған тауарларды сақтауға арналған екі функцияны әлем бойынша іске қосты. Жаңа мүмкіндіктер онлайн сауда іздеуін және таңдаған өнімдерді кейін табуды жеңілдетуге бағытталған.

ChatGPT-та виртуалды киіп көру

Виртуалды киіп көру үшін пайдаланушы селфиін немесе толық бойлы фотосуретін жүктейді. ChatGPT киім не аксессуардың адамның үстінде қалай көрінуі мүмкін екенін көрсетеді. Бұл мүмкіндік сауда нәтижелерінде жаңа Try On батырмасы арқылы ашылады.

Тауардың дайын суреті болса да, оны жүктеуге болады. Мысалы, веб-беттен алынған скриншотты беріп, ChatGPT-тан сол бұйымды өзіне кигізіп көрсетуді сұрауға болады. Демек, таңдау тек чаттағы ұсыныстармен шектелмейді: пайдаланушы өзі тапқан заттың бейнесін де сынап көре алады.

Сурет жасаудың жаңа моделі

OpenAI жаңа сауда функциялары жаңадан іске қосылған ChatGPT Images 2.5 моделіне сүйенетінін хабарлады. Компанияның айтуынша, модель жарықты табиғи етіп, текстураны қанығырақ көрсетеді. Ол өңдеу жөніндегі нұсқауларды сенімдірек орындайды әрі сурет жасау уақытын қысқартады.

Бұл мүмкіндіктер ChatGPT-ты тек өнім туралы ақпарат іздейтін құрал емес, киімнің сыртқы көрінісін алдын ала бағалауға көмектесетін орта ретінде ұсынады. Дегенмен, OpenAI жариялаған мәліметте виртуалды киіп көру нәтижесінің дәлдігіне қатысты өлшемдер келтірілмеген.

Таңдаулы тауарлар кітапханада

Favorites функциясы пайдаланушыға тауып алған өнімдерін қолданбадағы Library бөліміне сақтауға мүмкіндік береді. Кейін сол жерден қайта ашып қарай алады. Компанияның мәліметінше, сақталған тауарлар виртуалды киіп көру кезінде жасалған суреттермен бірге тұрады.

ChatGPT арқылы сауда іздеу бұлармен бітпейді. Пайдаланушы өзі байқап көргісі келетін стильді сипаттап, соған қажет киімдерді іздеуді сұрай алады. Сондай-ақ танымал адамдардың киім үлгісі түскен суретті жүктеп, ондағы сатып алуға болатын заттарды табуға өтініш бере алады.

Онлайн саудадағы бәсеке

TechCrunch бұл іске қосылуды жасанды интеллект көмекшілері саудаға қатысты қызметтерін кеңейтіп жатқан кезеңмен байланыстырады. OpenAI бұған дейін жедел сатып алу функциясын сынасан ч, ол күткендей нәтиже бермеген соң бағытын өзгерткен. Ал киімге шабыт іздеу мен тауар табу саласында Pinterest пен Google бұрыннан танымал. Google виртуалды киіп көру мүмкіндігін өткен жылы іске қосқан.

Жаңа функциялар ChatGPT-тың саудада пайдаланылу аясын кеңейтеді. Алайда оның адамдар үшін осындай іздеудегі негізгі таңдау бола ма, әзірге белгісіз.

Тақырып бойынша оқыңыз

• 100 миллиард параметрге дейін: NVIDIA DGX Spark-тың 64GB нұсқасы шығады
• Flow қызметкерлердің өтінішін Slack пен Teams ішінде орындайды
• Project Suncatcher спутнигі орбитаға жетті: Google TPU төзімділігін сынайды

Дереккөз: techcrunch.com