Сәтемір хан (Ақсақ Темір)
Тарихи аңыздар · 1 мин оқу
Сәтемір жеті жасар күнінде атасынан жетім қалып, күндерде бір күн далада ойнап жүріп, бір бұзылған үйдің түбінде шаршаған соң сүйеніп, жан-жағына қарап тұрса, бір аяғы ақсақ құмырсқа үйдің төбесіне қарай бара жатып, орта жеріне барғанда құлап түседі.
Тұра салып тағы өрмелейді. Бағанағыдан жоғары барғанда тағы құлап түседі. Ақыры өрмелей-өрмелей, қисая-мисая үйінің төбесіне шығып кетеді.
Сәтемір хан мұны көріп ойға кетті дейді:
«Жаратылыстағы ең кіші мақұлық құмырсқа—о да талап ете-ете ұмтылып, ақыры мұрадына жетті. Мұнда отырып бір нәрсе көбейтпей, айдалада ойнап жүргенім жараусыздық екен»,—деп, шаһарға барып бір ғалымның үйін сыпырып, ақысына оқу оқыпты. Ақырында сол Сәтемір атақты болды.