Ақсеркеш
Біржан сал Қожағұлұлы · 1834–1897 · 16 жол
Бір атты сатып міндім елу беске,
Болмайды шапсаң-дағы қара кешке,
Бозбала, бекер сал боп неге керек,
Салып қал шын сал болсаң «Ақсеркешке».
Бәйгеден озып келген атты алайын,
Ер жігіт сынамай ма бақталайын.
Жиылып үлкен-кіші отырғанда,
Толқытып «Ақсеркешке» ән салайын.
Жем жейді қара арғымақ «түрт» дегенде,
Аяғын әсем басар «қық» дегенде.
Жерлерге үш күншілік болады азық,
Аузынан жан қалқаның «үп» дегенде.
Бір атты сатып алдым елу беске,
Ертеден болдырмайды қара кешке.
Аралап неше дуан жүрсем-дағы
Өзімдей жан салмайды «Ақсеркешке».