Мектепке дейінгі білім беру – болашақтың берік іргетасы

Курбанбаева Айтбикеш Сисенбайқызы
“Хан-Сұлтан” балабақшасы
Тәрбиеші

Қазіргі таңда мектепке дейінгі білім беру – баланың тұлға болып қалыптасуындағы ең маңызды кезеңдердің бірі. Осы кезеңде баланың ой-өрісі дамып, сөйлеу мәдениеті, шығармашылық қабілеті мен ұлттық құндылықтарға деген сүйіспеншілігі қалыптасады. Осы орайда «Хан-Сұлтан» балабақшасының «Балдәурен» мад тобында жүйелі әрі мазмұнды тәрбие жұмыстары жүргізілуде.

Балабақшада балалардың жас ерекшеліктеріне сай ұйымдастырылған оқу-тәрбие үдерісі арқылы олардың танымдық қызығушылығы артып, өз ойын еркін жеткізе білуіне мүмкіндік жасалады. Түрлі ойын, шығармашылық тапсырмалар, көркем сөз оқу, ән айту, қимылды жаттығулар арқылы балалардың жан-жақты дамуына ерекше көңіл бөлінеді.

Топ жетекшісі Курбанбаева Айтбикеш Сисенбай қызы – өз ісіне жауапкершілікпен қарайтын, бала жүрегін түсіне білетін тәжірибелі педагог. Ол әр баланың қабілетін ескеріп, олардың бойындағы дарынын ашуға бағытталған жұмыстарды жүйелі түрде жүргізеді. Сабақ барысында ұлттық тәрбиеге, әдептілікке, бір-біріне деген құрмет пен мейірімге ерекше назар аударады.

«Балдәурен» тобының тәрбиеленушілері түрлі байқаулар мен шығармашылық іс-шараларға белсене қатысып, өз өнерлерін көрсетіп келеді. Мұндай жұмыстар балалардың өзіне деген сенімін арттырып, сахна мәдениетін қалыптастырады.

Қорытындылай келе, «Хан-Сұлтан» балабақшасы мен «Балдәурен» мад тобының оқу-тәрбие жұмысы – сапалы білім мен саналы тәрбие берудің жарқын үлгісі. Осындай еңбектің нәтижесінде болашақта елін сүйетін, білімді де тәрбиелі ұрпақ өсіп шығары сөзсіз.