Көлбай – Жанбай
Біржан сал Қожағұлұлы · 1834–1897 · 27 жол
Ар жақта отыратын Көлбай – Жанбай,
Шідерімді кім алды Ләйлім алмай?
Балағы шідерімнің алтын еді,
Асығыстан барамын сұрай алмай.
Қайырмасы.
Көлбай, Жанбай дегенге, Көлбай, Жанбай,
Тізгінімді кім алды, Ләйлім алмай?
Көлбай – Жанбай, тыңдашы, асыл тасым,
Біте қайнап, бірге өскен замандасым!
Көктен жел, жерден шайтан әкеткен жоқ,
Ұрлап алған – өзіңнің, қарындасың.
Қайырмасы.
Сегіз би съезіне бердім жөнге,
Шідерімді таң қалар көрген пенде.
Шідерімнің бағасын сұрасаңыз,
Бағасы болады оның жүз мың теңге.
Қайырмасы.
Көлбай – Жанбай дегенге, қалқам шырақ,
Ағып жатқан құм қайрақ, сен бір бұлақ.
Бағасын шідерімнін, сұрасаңыз,
Шідерімнің бағасы – қырық қысырақ.
Қайырмасы.
Көлбай – Жанбай дегендер асыл сүйек,
Бір тәңірден мен жүрмін тілек тілеп,
Форымын шідерімнің, сұрасаңыз,
Сап күмістен балағы, алтын тиек.
Қайырмасы.