Мұғалім - әлемдегі ең үздік мамандық

Мұғалім - әлемдегі ең үздік мамандық

Ұстаз бола білген адам нағыз бақытты жан болар. Ұстаздың ұлылығын ел басқарған басшы да, ғалым да, дана да мойындай білген. Өйткені кез-келген танымал тұлға - ұстазына бас иген ең білікті шәкірттер.

Мұғалім шәкірттерінің өмірінде ерекше орын алады, өйткені мұғалім белгілі бір пәннен білім беріп қана қоймай тәлімгер, сырлас досы , тіпті , екінші ата-анасы да бола білген. Шәкіртін шығармашылыққа баулып , жетістікке жету жолын бағыттай білген адам. Демек, ұстаз білім мен мәдениетті, құндылықтарды және баланың мінез құлық нормаларын қалыптастыруда шешуші роль атқарып , қоғамның дамуына да күш-жігерін жұмсап , орасан зор үлесін қосқан жан дер едім. Жазушы Ғафу Қайырбеков атамыз айтқандай “Ұстаз болу - жүректің батырлығы“.

Ұстазды құрметтемеген , ұлықтамаған ел жоқ болар. Ежелден-ақ ұстазға деген құрмет ерекше болған. Белгілі философ, ғалым, әлемнің екінші ұстазы Әл-Фараби өз ұстазы Аристотельді ұлықтағаны сонша , ұстаздың үйіне жақындағанда атынан түсіп, жаяу жүрген екен деген естелік жазбалар ел арасына кеңінен тараған. Ел аузындағы “Төрден орын ұстаздікі” деген жақсы сөз бекер болмас.

Қазіргі күнде ұстаз болу - таудан аққан тау өзені секілді жолында кездескендерді суымен нәрлендіріп, айналасына қуат берген, қиындықтарға мойымай білім мен рухани шығармашылықты ұштастырып, өз еңбегінен тыныштық тауып, дамылдайды. Ұстаз - қасиетті қасиетті мамандық иелерінің ішіндегі ең жоғарғысы деп білемін, өйткені, ұстаз - жас ұрпаққа адамгершілік қасиеттердің дәнін еккен дақылшы.

Менің мамандығым әлемдегі ең үздік мамандық - мұғалім. Қиындығы мен қызығы мол осы мамандықты бала кезімнен армандап, қол жеткіздім. Мұғалім - шәкіртінің болашағын қалыптастыратын шәкірт жүрегінен мәңгілік орын алатын әлемдегі ең жақсы мамандық.

Шындығында, ұстаз болу неткен бақыт десеңізші…Әлемдегі түрлі ғажайыптың ішіндегі ең кереметі - зор біліммен жақсы тәрбиеленген адам. Ал осы екеуін беретін - ұстаз. Мен де өз ұстаздарымды құрметтеп, оларға бас иемін. Ұстаз еңбегі ел үшін де, шәкірт үшін де зор мәртебе екенін ұмытпайық.

Сейсенбай Қожахмет

49 ЖББМ “Сырдария”