Балғын қолың іс алып
Бесік жырлары · 1 мин оқу
Балғын қолың іс алып,
Балдыр мойның күш алып.
Бізді бағар ма екенсің?!
Сом құрықты майырып,
Түнде жылқы қайырып,
Жаудан елді айырып,
Жігіт болар ма екенсің?!
Дулыға-сауыт киініп,
Жауға батыл тиісіп.
Батыр болар ма екенсің?!
Өлең сөзден дес бермес,
Нөсерлетер төске өрлеп,
Ақын болар ма екенсің?!
Таңдайларың тақылдап,
Шешендерді тақымдап.
Сөз сөйлейтін тақпақтап,
Шешен болар ма екенсің?!
Дүйім елді бастайтын,
Қиын жерде саспайтын.
Бақ-дәулетке таспайтын,
Көсем болар ма екенсің?!