Әлди-әлди, ақ бөпем
Бесік жырлары · 1 мин оқу
Әлди-әлди, ақ бөпем,
Ақ бесікке жат, бөпем!
Балапандай мұзбалақ,
Қанатыңды қақ, бөпем!
Арыстандай жауыңа,
Айбаттанып шап, бөпем!
Қай-қашанда халқыңды,
Қамқоршы боп бақ, бөпем!
Өз құрбыңның алды боп,
Өнер шамын жақ, бөпем!
Ата-бабаң таппаған
Тапқырлықтар тап, бөпем!
Кең бол байтақ далаңдай,
Далаң жомарт – анаңдай.
Сүйсең Отан, жеріңді,
Болар анаң көңілі жай,
Әлди-әлди, әлди-ай!
Аспандағы жұлдызым,
Суда жүзген құндызым.
Ізгі ісіңе ел сүйінер,
Қас қырандай шүйілер,
Азамат бол, әлди-ай!