Қазақстанда спорт қалай дамиды?
Жыл сайын тамыз айының әр үшінші жексенбісінде Қазақстанда Спорт күні атап өтіледі. Қазақстанда бұқаралық спортты, сондай-ақ жоғары жетістіктер спортын дамыту үшін не істеліп жатыр, деп хабарлады ОКҚ-да өткен баспасөз мәслихатында ҚР Мәдениет және спорт министрлігі Спорт және дене шынықтыру істері комитеті төрағасының орынбасарлары Бекболат Байжанов пен Айгүл Бектенова.
“Мемлекет басшысының тапсырмасы бойынша елімізде спортты насихаттау бойынша үлкен жұмыстар жүргізілуде. Осының арқасында бүгінгі таңда 6,5 миллионнан астам адам дене шынықтырумен және спортпен жүйелі түрде айналысады”
Бекболат Байжанов
Спикердің айтуынша, бүгінгі таңда 481 БЖСМ-де 386 519 бала мен жасөспірім айналысады, олармен 14 443 жаттықтырушы-оқытушы жұмыс істейді, 12 өңірде спорттағы дарынды балаларға арналған 13 облыстық мектеп-интернат жұмыс істейді, онда 3 995 тәрбиеленуші оқиды. Сонымен қатар спорттағы дарынды балаларға арналған олимпиадалық резервтің 4 республикалық мамандандырылған мектеп-интернат-колледжі және республикалық спорт колледжі жұмыс істейді.
“2022 жылдың 1 шілдесінен бастап 2024 жылға дейін біз спорт төрешілерінің жұмыс ақысын базалық лауазымдық жалақыдан 10% – дан 100% – ға дейін арттырамыз. Биылғы жылы, мысалы, төрешілер жарыстың бір күні 8 мың теңге, ал бұрын – 2 600 теңге алатын болады. Келесі жылы – 13 мың теңге, 2024 жылы-17 мың теңге”
Бекболат Байжанов
Өңірлерде паралимпиадалық спорт түрлерін қолдау және дамыту үшін республикалық деңгейде жұмыс істейтін ұйым типі бойынша мүмкіндіктері шектеулі адамдар үшін спорттық даярлау орталықтарын құру жоспарлануда.
Сонымен қатар, Мемлекет спорт ғимараттарының тапшылығын жою бойынша жұмыс жүргізуде. Биыл Алматы, Атырау, Қарағанды, Қызылорда, Павлодар және Солтүстік Қазақстан облыстарында 10 Фок салу көзделген.
Сондай-ақ, ведомствода дене шынықтыру және спорт туралы заңнаманы жетілдіру бойынша жұмыстар жүргізілуде.
